Gəncədə “Heydər Əliyev İli” çərçivəsində ağacəkmə aksiyası keçirilib

Fövqəladə Hallar Nazirliyinin Gəncə Regional Mərkəzi “Heydər Əliyev İli” çərçivəsində ağacəkmə aksiyası keçirib.

Bu barədə "Report"a FHN-dən məlumat verilib.

Bildirilib ki, mərkəzin şəxsi heyətinin iştirakı ilə ağacəkmə aksiyası Gəncə şəhəri Heydər Əliyev Park-kompleksində ayrılmış ərazidə təşkil edilib.

Aksiyanın keçirilməsində məqsəd ölkəmizdə ekologiyanın qorunması və ətraf mühitin sağlamlaşdırılmasına hər zaman böyük əhəmiyyət vermiş ulu öndər Heydər Əliyevin əziz xatirəsini yad etmək, eləcə də insanlar arasında ekoloji mədəniyyəti, təbiətə olan qayğı hissini təbliğ etməkdən ibarət olub.

Aksiya çərçivəsində ərazidə xeyli sayda şam ağacı əkilib, gübrələmə və suvarma işləri aparılıb.