Azərbaycandan Rusiyaya gedən vətəndaşdan dərman preparatı götürülüb

Bakı. 21 dekabr. REPORT.AZ/ Azərbaycan istiqamətindən "Samur" gömrük postunun ixrac piyada keçid xəttinə daxil olan Azərbaycan vətəndaşı saxlanılıb və üzərində şəxsi yoxlama aparılıb.

Dövlət Gömrük Komitəsindən “Report”a verilən məlumata görə, yoxlama zamanı vətəndaşın əynindəki gödəkçənin iç sol cibindən 7 kapsul "Lyrica (preqabalin) 300 mq" adlı dərman preparatı aşkar olunub.

Xatırladaq ki, "Lyrica (preqabalin)" adlı dərman preparatları Azərbaycan Respublikasının müvafiq qanunu ilə təsdiq edilmiş "Güclü təsir edən maddələrin və onların külli miqdarının Siyahısı"na daxildir.

Faktla bağlı araşdırma aparılır.