Vuçiç: Serbiyanın qarşıdakı beş ildə Avropa İttifaqının tamhüquqlu üzvü olmayacağını bilirəm

Avropa İttifaqına (Aİ) üzvlük Serbiyanın uzunmüddətli məqsədi olaraq qalsa da, Belqrad bu proseslə bağlı müəyyən olunan müddətə realist yanaşmağın tərəfdarıdır.

"Report"un Balkan bürosu xəbər verir ki, bunu Serbiya Prezidenti Aleksandar Vuçiç bildirib.

O, Brüsselin ittifaqın üzvlərin qəbulu ilə bağlı irəli sürdüyü yeni şərtlər və təşəbbüsləri şərh edib. O, sözügedən məsələdə yanaşmasının başqalarınınkından fərqli olduğunu deyib:

"Düşünürəm ki, Avropa yolumuzu başa çatdırmaq və Avropa İttifaqına üzvlük prosesi ilə bağlı arzularımızdan daha vacib məsələlər var. Çünki bilirəm ki, qarşıdakı bir, iki, üç, dörd və ya beş il ərzində biz Avropa İttifaqının tamhüquqlu üzvü olmayacağıq".