Gürcüstanın xarici ticarət dövriyyəsi 25 % artıb 

Bu ilin yanvar-noyabr aylarında Gürcüstanın xarici ticarət dövriyyəsinin həcmi 12 milyard 828,3 milyon ABŞ dollarına bərabər olub.

“Report”un yerli bürosu xəbər verir ki, bu barədə Gürcüstanın Milli Statistika İdarəsinin hesabatında bildirilib.

Sənədə əsasən, bu, ötən ilin eyni dövrünə nisbətdə 25,2 % çoxdur.

İlk 11 ayda qonşu ölkənin ixracının dəyəri 3 milyard 822,3 milyon dollar (+26,7 %), idxalının dəyəri isə 9 milyard 006 milyon ABŞ dolları (+24,5 %) təşkil edib.

Hesabat dövründə 5 milyard 183,6 milyon dollarlıq kəsir yaranıb ki, bunun da ümumi xarici ticarət dövriyyəsindəki payı 40,4 %-dir.