Mohd Rizal bin Osman: Şəhərlərin dayanıqlığı ərzaq təhlükəsizliyi məsələlərini də əhatə edir

Geosiyasi böhranlar, münaqişələr və sürətlənən iqlim dəyişiklikləri şəraitində şəhərlər davamlı inkişaf siyasətinin formalaşdırılmasında məlumatlara və sübut bazasına əsaslanmalıdır.

"Report"un məlumatına görə, bunu "URBANICE Malaysia"nın baş əməliyyat direktoru doktor Mohd Rizal bin Osman Bakıda WUF13 çərçivəsində Asiya-Sakit Okean regionunun Şəhər Gündəliyi Platformasından (AP-UAP) istifadə edilməklə keçirilən tədbirdə bildirib.

Onun sözlərinə görə, mövcud qlobal çağırışlar, o cümlədən təchizat zəncirlərindəki pozuntular və iqlim fəlakətlərinin intensivləşməsi dayanıqlı şəhərlərin formalaşdırılmasına yanaşmaların gücləndirilməsini tələb edir, burada birinci əsas addım məlumatlar və faktiki sübutlar əsasında risklərin tanınmasıdır.

"Asiya-Sakit okean regionunun şəhər gündəliyi platforması qlobal və milli siyasətləri lokallaşdırmağa, onları ştat və şəhər səviyyəsində praktiki tədbirlərə, o cümlədən fəlakət risklərinin azaldılması tədbirlərinə çevirməyə kömək edir", – o qeyd edib.

Doktor Mohd Rizal bin Osman vurğulayıb ki, Malayziyada fəlakət risklərinin idarə edilməsi müvafiq komitələr vasitəsilə milli və yerli səviyyələrdə əlaqələndirilir, federal, regional və bələdiyyə hakimiyyət orqanlarının qarşılıqlı əlaqəsini təmin edir.

"Şəhərlərin dayanıqlığı yalnız fiziki infrastrukturu deyil, həm də sosial komponenti, o cümlədən şəhər kənd təsərrüfatının inkişafı və icmaların gücləndirilməsi vasitəsilə ərzaq təhlükəsizliyi məsələlərini əhatə edir" - baş əməliyyat direktoru qeyd edib.

O əlavə edib ki, Malayziyada artıq müxtəlif təbii təhlükələr, o cümlədən qəfil daşqınlar, torpaq sürüşmələri, sahil xəttinin eroziyası və subasmalar müşahidə olunur ki, bu da hər bir ərazi növünə differensiallaşdırılmış yanaşma tələb edir.