Enn Vambui: Qeyri-rəsmi yaşayış məskənləri iqlim dəyişikliyindən ən çox zərər görən ərazilərdir

Əksər insanlar üçün iqlim dəyişikliyi gələcəyin böhranı olaraq qalır, lakin qeyri-rəsmi yaşayış məskənlərinin sakinləri üçün o, artıq gündəlik həyatın bir hissəsinə çevrilib.

"Report" xəbər verir ki, bu barədə Keniyanın qeyri-rəsmi yaşayış məskənləri sakinlərinin "Muungano wa Wanavijiji" hərəkatının nümayəndəsi Enn Vambui Ümumdünya Şəhərsalma Forumunun 13-cü sessiyası (WUF13) çərçivəsində keçirilən "İcma məlumatlarından ictimai təsirə - praktiki təcrübəyə malik ekspertlərin baxışı" adlı tədbirdə bildirib.

"Biz bununla daşqınlar, pis sanitariya vəziyyəti, su qıtlığı, həddindən artıq sıxlıq, köçürmə və ekoloji sağlamlıq riskləri vasitəsilə üzləşirik", - o qeyd edib.

E.Vambuinin sözlərinə görə, iqlim dəyişikliklərinin nəticələri xüsusilə qadınlara və qızlara güclü təsir göstərir.

O vurğulayıb ki, daşqınlar həmçinin xəstəliklərin yayılması riskini artırır: "Məhz buna görə iqlim ədaləti haqqında söhbətlər gender ədaləti, səhiyyə, mənzil, sanitariya və əsas xidmətlərə çıxış məsələlərini əhatə etməlidir".