Gürcüstanın müstəqillik referendumundan 30 il ötür

Bu gün Gürcüstanın dövlət müstəqilliyinin bərpası üzrə ümumxalq səsverməsinin keçirilməsindən 30 il ötür.

“Report”un yerli bürosu xatırladır ki, 1991-ci ilin martın 31-də referendumda seçicilərin 90,79%-i iştirak edib və onların 99,08%-i müstəqilliyin bərpasını dəstəkləyib.

Səsvermədə seçicilər bir – “1918-ci il 26 may tarixli aktın əsasında Gürcüstanın dövlət müstəqilliyinin bərpasına razısınızmı?” sualına cavab verməli olublar.

Referendumun nəticələri aprelin 5-də elan olunub. Aprelin 9-da Gürcüstanın Ali Şurası dövlət müstəqilliyinin bərpası haqqında akt qəbul edib.

Qonşu ölkədə Müstəqillik günü aprelin 9-da deyil, ilk müstəqil respublikanın yarandığı tarixdə – mayın 26-da qeyd olunur.