Gürcüstan Türkiyəyə axtarış-xilasetmə qrupu göndərib

Gürcüstan hökuməti Kahramanmaraşda baş verən zəlzələlərdə dağıntılar altında qalanların xilas edilməsinə dəstək olmaq üçün Türkiyəyə axtarış-xilasetmə qrupu göndərib.

"Report" Gürcüstan mətbuatına istinadən xəbər verir ki, bu barədə ölkənin Daxili İşlər Nazirliyi məlumat yayıb.

Belə ki, 60 nəfərdən ibarət axtarış-xilasetmə qrupu artıq yola düşüb.

Açıqlamada o da bildirilib ki, təlim keçmiş itlər və müvafiq avadanlıqlar komanda ilə birlikdə Türkiyəyə göndərilib.

Qeyd edək ki, güclü zəlzələ nəticəsində ölənlərin sayı 1651-ə, yaralıların sayı isə 11 119-a çatıb. Təbii fəlakət nəticəsində 3 471 bina dağılıb.

Fevralın 6-da Türkiyənin Kahramanmaraş vilayətində 7,7 və 7,6 maqnitudalı iki zəlzələ baş verib.