Naxçıvanda bu il 1 milyon manatdan çox ipoteka krediti verilib

Bu ilin yanvar-mart aylarında Naxçıvan Muxtar Respublikasında 1 milyon 089,2 min manat məbləğində ipoteka krediti verilib.

“Report” bu barədə Azərbaycan Mərkəzi Bankının (AMB) yerli idarəsinə istinadən xəbər verir.

Bunun 55,2 %-i və ya 600,7 min manatı güzəştli şərtlərlə, 44,8 %-i və ya 488,5 min manatı isə digər şərtlərlə verilib.

Hesabat dövründə regionda 16 nəfər ipoteka krediti götürüb ki, bunlardan 9-u güzəştli, 7-si isə digər şərtlərlə ipoteka krediti sahibi olub.

Bu il aprelin 1-nə (2010-ci ildən) Naxçıvanda ümumilikdə 60 milyon 472,6 min manat ipoteka krediti verilib. Bunun da, 15,613 milyon manatı güzəştli şərtlərlə, 44 milyon 859,6 min manatı isə digər şərtlərlə təqdim edilib.