Lənkəranda yaşayış binasında yanğın olub

Lənkəranda iki mərtəbəli kommunal binada yanğın olub.

“Report”un Cənub bürosunun xəbərinə görə, hadisə rayonun Girdəni kəndində “mikrorayon” adlandırılan ərazidə yerləşən iki mərtəbəli, 8 mənzilli yaşayış binasında baş verib.

Belə ki, FHN-nin Lənkəran Dövlət Yanğından Mühafizə hissəsinə yanğınla bağlı müraciət olunub. Hadisə yerinə yanğınsöndürən texnika və şəxsi heyət cəlb olunub.

Bina sakinlərinin təxliyyəsinə ehtiyac olmayıb.

Zümrüd Mahmudağa qızı Salayevaya məxsus mənzildə baş verən yanğının genişlənməsinin və ətrafa yayılmasının qarşısı alınıb.

Hadisə zamanı mənzildə heç kim olmayıb.

Yanğının elektrik avadanlığında baş verdiyi ehtimal edilir. Faktla bağlı araşdırma aparılır.