Bərdədə oğurluq etdikdən sonra evi yandıran dəstə üzvləri tutulub

Bərdə. 3 noyabr. REPORT.AZ/ Bərdə rayon sakininin evindən oğurluq edən şəxslər daha sonra oranı yandırıblar. "Report"un Qarabağ bürosu xəbər verir ki, hadisə noyabrın 1-də rayonun Saatlı kəndi ərazisində qeydə alınıb. 

Belə ki, həmin kəndin sakini İbrahim Abbasovun evindən məişət əşyaları və təmir-tikinti alətləri oğurlanıb, daha sonra ev qəsdən yandırılıb. 

Bərdə Rayon Polis Şöbəsinin (RPŞ) əməkdaşlarının həyata keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən həmkəndliləri Murad Abbasov, Müslüm Qasımov, Dinar Xasaylı və İslam Qəmbərov tutulublar.

Faktla əlaqədar cinayət işi başlanılıb, araşdırmalar davam etdirilir.