Bakıda özünü DSMF-nin sürücüsü kimi təqdim edən şəxs 3 nəfərə qarşı dələduzluq edib

Bakıda 3 nəfərə qarşı dələduzluq edilib.

“Report”un əldə etdiyi məlumata görə, hadisə paytaxtın Suraxanı rayonu ərazisində qeydə alınıb.

Belə ki, Bakı şəhər sakini Tural Quliyev vətəndaşlar - Habil Nəsirov, Rza Quliyev və Səbuhi İsmayılova özünü Dövlət Sosial Müdafiə Fondunun sürücüsü kimi təqdim edib. O, etibarını qazandığı şəxsləri müxtəlif dövlət qurumlarında sürücü vəzifəsinə düzəldəcəyini deyərək hərəsindən ayrı-ayrılıqda 3 min manat olmaqla, ümumilikdə 9 min manat pul alıb.

Daha sonra o, vədinə əməl etməyib.

Hadisə ilə bağlı hər üç şəxs Suraxanı Rayon Polis İdarəsinə müraciət edib. T.Quliyev saxlanılıb və vətəndaşlara vurduğu maddi ziyan ödətdirilib.