Bu il “Azəriqaz” çoxmərtəbəli binalar üzrə 2800-dən çox mənzilə təbii qaz verib

Bakı. 4 mart. REPORT.AZ/ “Azəriqaz” İstehsalat Birliyi çoxmərtəbəli binalara təbii qazın verilməsi istiqamətində fəaliyyətini davam etdirir.

Birlikdən “Report”a verilən məlumata görə, görülmüş işlərin nəticəsində bu ilin yanvar-fevral ayları ərzində hüquqi və fiziki şəxslərin müraciətlərini araşdıraraq müvafiq sənədləri təqdim olunan çoxmərtəbəli binalar üzrə təbii qazın verilməsini təmin edib. Qeyd edək ki, həmin binalarda, ümumilikdə, 2827 ailə yaşayır.

“Azəriqaz” təbii qazın satışı ilə məşğul olan bir qurum kimi zəruri sənədləri təqdim etmiş, bütün normativ-texniki və təhlükəsizlik tələblərinə cavab verən istənilən çoxmərtəbəli binanın ən qısa müddətdə “mavi yanacaq”la təmin olunmasında maraqlıdır.