BP iyun ayında Bakı-Tbilisi-Supsa kəməri ilə neft nəqlini bərpa etməyi planlaşdırmır

“Azəri-Çıraq-Günəşli” yataqlarında hasilat işləri aparan əməliyyat şirkəti iyun ayında Bakı-Tbilisi-Supsa kəməri ilə neft nəqlini bərpa etməyi planlaşdırmır.

Bu barədə “Report”a layihənin operator-şirkəti olan BP-dən məlumat verilib.

Şirkətdən bildirib ki, müvafiq olaraq, Gürcüstanın Qara dəniz sahillərində yerləşən Supsa terminalı da işləməyəcək.

“Bu, neftdaşıyan tankerlərin yükləmə üçün Supsa limanına gəlməsi risklərindən və beləliklə, Qara dənizin bu limanından neftin yüklənməsinin aparılmasının mümkünsüzlüyündən irəli gələn ehtiyat tədbiridir”, - BP-nin məlumatında deyilir.

Xatırladaq ki, daha əvvəl “Report”a verilən məlumata görə, may ayında da Supsadan neftin yüklənməsi reallaşdırılmayıb.