ABŞ-da ehtiyatlarla bağlı məlumatlar neftin qiymətini sabitləşdirib

Amerika Neft İnstitutu (API) ABŞ-da neft ehtiyatları haqqında statistik məlumatları dərc etdikdən sonra dünya bazarlarında neftin qiyməti sabitləşib.

“Report” birjalara istinadən xəbər verir ki, Şimal dənizində hasil olunan “Brent” neftinin mart fyuçersləri 0,08% bahalaşaraq, 1 bareli 78,73 ABŞ dollarına satılıb. WTI neftinin fevral fyuçerslərinin qiyməti isə dəyişməyib və 1 bareli 75,98 ABŞ dolları təşkil edib.

API-nin məlumatına əsasən dekabrın 24-dək olan həftə ərzində ABŞ-da “qara qızıl” ehtiyatı 3,09 milyon barel azalıb. Analitiklər azalmanın 3,233 milyon barel təşkil edəcəyini gözləyirdilər.

ABŞ-ın Energetika Nazirliyi ölkənin neft ehtiyatları ilə bağlı rəsmi statistikanı bu gün açıqlayacaq.