İndoneziyada bərədə baş verən yanğında beş nəfər ölüb, onlarla insan itkin düşüb

İndoneziyanın Madura adası sahillərində göyərtəsində 271 sərnişin və ekipaj üzvünün olduğu bərədə yanğın baş verib.

"Report"un Reuters agentliyinə istinadən verdiyi məlumata görə, hadisə nəticəsində 5 nəfər həlak olub, daha 41 nəfər itkin düşüb.

Axtarış-xilasetmə xidmətinin məlumatına əsasən, 225 nəfər xilas edilib.

Qeyd olunur ki, bərə Şərqi Yava əyalətinin Surabaya şəhərindən Cənubi Sulavesi əyalətinin Makassar şəhərinə gedirmiş.

Yanğının başvermə səbəbi araşdırılır. Axtarış-xilasetmə əməliyyatları davam edir.