FT: Airbus ABŞ-dəki kosmik bölməsini satmaq niyyətindədir

Avropanın ən böyük aerokosmik şirkəti "Airbus" peyk rabitəsi sahəsində ümumavropa konqlomeratının yaradılması istiqamətində səylərini birləşdirmək üçün Amerika kosmik bölməsinin satılması imkanını nəzərdən keçirir.

"Report" xəbər verir ki, bu barədə "Financial Times" (FT) qəzeti mənbələrə istinadən məlumat yayıb.

Məlumata görə, hazırda şirkət potensial alıcıların onun Amerika biznesinə olan marağını qiymətləndirir. "Airbus US Space Systems"in aktivlərinə Floridadakı zavod daxildir.

Bölmənin gəliri bir neçə yüz milyon dollar həcmində qiymətləndirilir.

Jurnalistlər qeyd ediblər ki, Amerika aktivlərinin satışı "Airbus"ın 2024-cü ildə 989 milyon avro zərər gətirən biznesini bərpa etmək üçün növbəti cəhdi olacaq.