Danimarka Bornholm adasındakı hərbi mövcudluğunu gücləndirəcək

Danimarka Nazirlər Kabineti Baltik dənizi sahilindəki Bornholm adasındakı hərbçilərin sayını artırmaq barədə qərar qəbul edib.

“Report” xəbər verir ki, bu barədə ölkənin Müdafiə Nazirliyi məlumat yayıb.

Hazırda adada 200 nəfərlik kəşfiyyat bölməsi yerləşdirilib. Onun Danimarkanın başqa ərazisinə köçürülməsi planlaşdırılır.

Bornholmda yerləşdirilmək üçün 1000 nəfərə qədər ayrıca piyada alayının yaradılması təklif olunur. Yeni bölmənin məqsədi Baltikdə Danimarka müdafiəsini gücləndirmək olacaq.

Qeyd edək ki, 2033-cü ilə qədər Kopenhagen ordunun sayını 5 min nəfər artıraraq 28 min nəfərə çatdırmağı planlaşdırır. Çağırışçıların sayı 6,5 min nəfərə çatdırılacaq.